تجربتي الشخصية: بقالي حوالي سنتين، نادرًا ما أترجم في ملف Word مباشرة من PDF.
95% من شغلي بيكون على أدوات الترجمة بمساعدة الحاسوب CAT Tools للميزات التالية:
مميزات الـ CAT Tools
- النص المصدر (السورس) والترجمة (التارجت) قصاد بعض في واجهة سهلة ومتقسمين.
- توحيد المصطلحات بنسبة تصل إلى 100%
- ضبط التنسيق ، البرنامج بيخرج الملف شبه الأصل، وبيحتاج لمسات بسيطة لضبط التنسيق
- ذاكرة الترجمة، لو بترجم في مجال محدد، مش كل مرة هبحث عن مصطلحات بحثت عنها قبل كده، الذاكرة يتوفر عليا كل ده.
- توفير الوقت والمجهود، فيه مشاريع نسبة التشابه فيها ممكن يوصل 50%، بمعنى إنك لو هترجم يدويًا هتضطر تستخدم أساليب بدائية زي إنك تدور على اللي ترجمته قبل كده، وتنسخه، وتعدل فيه. أما البرنامج فبيحددلك بدقة إيه اتغيّر في الفقرة.
- ضبط الأرقام ، مع البرامج دي أخطاء الأرقام بقت شبه منعدمة، زمان كنت بضطر أراجع الأرقام كذا مرة، وبرضه كانت بتبقى فيه أخطاء (لأني بشر) أمّا الآلة فلا ترحم.
عيوب الـ CAT Tools
- تقسيم الفقرات أحيانًا بيخليك تفقد روح السياق، وتنسى تضيف الروابط اللي بين الجمل.
وخد بالك : أغلب الشركات اللي بتحتاج خدمات ترجمة (وساعات بيكون العميل نفسه) بتتجه لأدوات الترجمة على الإنترنت، أو أداة أونلاين خاصة بيها، طبعًا مش حبًا في الأدوات بل لضمان مصلحتها:
من توحيد المصطلحات وضبط الجودة، وتوفير الوقت في ترجمة حاجات اترجمت قبل كده ومحتاجة تغييرات طفيفة.
زي شركة جرّارات مثلا، دليل استخدام موديل محدد من جرار اترجم مرة، ولكن في الموديل التالي من الجرار حصلت تغييرات طفيفة.
فبدل من ترجمة الدليل كاملًا من الأول، بندخله في البرانامج ونترجم المختلف فقط اللي ممكن يكون 1%. بمعنى إن الشركة وفرت ترجمة دليل استخدام كامل.
أشهر برامج الترجمة بمساعدة الحاسوب
- SDL Trados
- MemoQ
- Wordfast
- Across